今次無故仔講，只係岩岩機緣巧合之下睇左明珠台一個節目，叫做《地獄酒店》。由於我第一次睇，所以唔係好清楚，有錯更正。個節目大概講主持人Gordon專門救一啲垃圾酒店，幫佢地重新上返軌道，提升入住率等等。
今集講一間酒店主人經營左間酒店好耐，但一直入住率好低，而且仲差人百幾萬，當Gordon到左間酒店後，發現間酒店真係好垃圾，佢真係睇住黎屌，攪到我都想屌埋一份。
點解? 因為間酒店主人實在太令人激心，無啦啦間酒店養狗，由隻狗周圍走，隨便大小便，攪到成間酒店都充斥住臭味，當Gordon提點時，酒店主人卻笑笑口話係特色黎。唯一一處賣點既舞廳裝修非常老土，牆色好似啲殯儀館咁，完全浪費哂，但個酒店主人卻笑笑口話自己裝修左五萬以上，仲感到好自豪。
當Gordon不斷發現間酒店有好多問題時，，酒店主人都全部唔同意，最重要係佢一直都笑笑口，完全係Who fucking care。最令我感到激心既係，佢背後一個好重要既女人，佢老婆。一直係佢身邊捱，捱左13年，得黎既係無得假期既日子，夫妻關係破裂咁濟，同埋一筆110萬美金既債項。當佢提出意見時，酒店主人都一笑置之。
講到依到，我覺得依一集好似見到好多家庭既縮影咁，我相信唔少家庭都有咁既問題，做老公既，永遠唔知自己問題出係邊到，而且仲覺得自己岩哂，完全自我感覺良好。當個老婆辛辛苦苦係個廚房煮野食，個老公可以完全咩都唔做，拎住報紙坐係大廳到，個主持都忍唔住講左句:『依家我生活係百幾年代前既社會?』
做仔女既(Gordon)當見到依個問題時，向對方提出，對方反而完全唔覺得係問題，仲暗串我地係咪扮演心理輔導員，仲可以話食鹽多過你食米，由仔女向自己父母說教? 佢地會聽咩? 做仔女既不斷激心，就算不斷罵對方，人地真係一笑置之。
我嗰刻覺得依段婚姻完全無得救，仲可以點救?
Gordon知對方唔肯聽唔肯改，甚至唔覺得係問題，於是call左成班客人當住酒店主人面前數哂所有問題出黎。嗰刻我又諗起唔少親戚或朋友都會做和事佬，從中介入依段婚姻。
眼見劇中夫妻關係接近崩潰，當個老婆向Gordon喊住講好想離開，因為真係好辛苦。主持人講左一句: you can be happy。 之後我都唔洗講，主持人比佢地兩個面對面傾計，講出大家心目中所諗既野，所追求既野，最終主持人救左間酒店，仲救左依段婚姻，嗰刻我真係睇到眼濕濕。
我係到諗，做人仔女，一個局外人既身份其實真係可以睇清好多問題所在，每次父母嘈交時侯，做仔女既我地真係唔好受，我地唔想一直都保持一個心態 " 由佢嘈啦，過幾日就無事架啦 " 而由得個屋企關係一直惡化落去，就好似拎住一個計時炸彈咁，得閒就爆，咁既屋企仲係健康嗎?
做人老公既，點解可以所有問題出現係眼前時，都可以都無視，點解可以永遠都保持自我感覺良好，點解可以覺得做任何事都岩?
做人老婆既，點解唔可以將心入面既感受講出黎? 既然一直受苦，感覺唔好受，但因為心中一啲無謂既顧慮而喊住去支撐住一段唔健康既婚姻?
如果Gordon拍完《地獄酒店》，其實可以拍返套《地獄家庭》，我好期待，同時可以學到一啲家庭相處之道。
btw: 希望阿仙奴可以穩博歐聯席位。
Search